ភ្នំពេញ: ក្រសួងអប់រំ យុវជន និងកីឡា បានប្រកាសដល់គ្រប់សាលារៀន នៅតំបន់មានហានិភ័យទាប ឲ្យរៀននៅតាមសាលារៀនបាន តែត្រូវមានចំនួនតិចជាង១៥នាក់ និងឆ្លាស់វេន ដើម្បីងាយស្រួលក្នុងការបង្រៀន និងការគ្រប់គ្រង។

ក្រសួងអប់រំបានបញ្ជាក់ថាចំពោះកម្រិតថ្នាក់ផ្សេងទៀត អាចរៀបចំការរៀនជាបណ្តុំ មិនឲ្យលើសពី១៥នាក់ ទៅតាមស្ថានភាពជាក់ស្តែង ដោយអាចរៀបចំការរៀន និងបែងចែកវេន ឬបណ្តុំតាមចម្រុះថ្នាក់, ឬអាចរៀបចំនៅតាមផ្ទះ វត្តអារាម ឬកន្លែងសមស្រប។

ក្រសួងអប់រំនៅតែបន្តអនុវត្តការបង្រៀនតាមបែបចម្រុះ និងតាមប្រព័ន្ធអេឡិចត្រូនិក ដោយគ្រូបង្រៀនអាចបង្រៀន និងផ្ដល់ឱកាសដល់សិស្ស ក្នុងការធ្វើស្វ័យសិក្សា ដោយប្រើប្រាស់សៀវភៅសិក្សាគោល និងតាមបែបអេឡិចត្រូនិកអនុវត្តការធ្វើតេស្ត។

ក្រសួងអប់រំបានបន្ថែមថាគ្រូបង្រៀន ដែលមានអាយុលើសពី៥០ឆ្នាំឡើង គួរតែបង្រៀនតាមអនឡាញ ឬចែកសន្លឹកកិច្ចការ។ ហើយហាមមិនអនុញ្ញាតឲ្យមានការលក់ដូរចំណី ឬអាហារ និងសកម្មភាពហាត់កីឡា នៅក្នុងគ្រឹះស្ថានសិក្សានោះទេ។

សម្តេចតេជោនាយករដ្ឋមន្ត្រី បានណែនាំដល់រដ្ឋមន្រ្តីក្រសួងអប់រំ យុវជន និងកីឡា ឲ្យពិភាក្សាជាមួយអភិបាលរាជធានីខេត្តទាំងអស់ ដើម្បីបើកសាលារៀនឡើងវិញ នៅទីតាំងដែលគ្មានការឆ្លងរីករាលដាលជំងឺកូវីដ-១៩ នៅតាមទីជនបទ ក្នុងប្រទេសកម្ពុជា កាលពីព្រឹកថ្ងៃអង្គារ ទី៣១ ខែសីហា ឆ្នាំ២០២១នេះ៕